Os espidos de José María González Collado na José Lorenzo
Ao longo deste mes poderemos gozar na Galería de Arte Contemporánea José Lorenzo da obra deste pintos ferrolán, nado no 26, e formado en Madrid, París e Alemaña. A súa obra está presente en España, Xapón, Francia, os EUA, Bélxica, Holanda, Arxel, Tunicia, Venezuela e Inglaterra. Destaca especialmente como acuarelista de paisaxes, e tamén como ilustrador en numerosos medios galegos e nacionais, e no deseño de carteis, debuxos publicitarios e libros.
Aos 12 anos ingresou na Escola de Artes e Oficios de Ferrol, fundada no ano 1881, a máis antiga deste tipo en Galiza, pola que pasaron entre outros Bello Piñeiro, Imeldo Corral, Carmelo González, ou Martínez Vilela. Matricúlase en Debuxo, Aritmética e Xeometría, e recibe clases de Eduardo da Veiga, pero por pouco tempo xa que o seu espírito inquedo e a súa gran facilidade para o debuxo fan que non se amolde ao ritmo dos seus condiscípulos. Abúrrese coas copias e os exercicios que lle mandan facer, realiza outros debuxos..., e abandona. Con todo, a paixón polo debuxo e a pintura xa irán sempre con el.Aos 17 anos recibe o seu primeiro premio na Exposición de Arte, Educación E Descanso, na Coruña (1943); aos 18 gana o primeiro premio na V Exposición de Arte do SEU, na Coruña e concédenlle unha bolsa de axuda xuvenil coa que irá estudar a Madrid. En 1944 realiza a súa primeira exposición individual no Casino Ferrolano, cando soamente contaba 18 anos.En 1945 desprázase a Madrid. O afán de aprender é enorme e a diario visita o museo do Prado: sente fascinación por Velázquez, admira a Goya, ao que considera o mellor pintor do mundo, precursor do impresionismo e da pintura moderna. Por fin ten a oportunidade de realizar o exame de ingreso na Escola de Belas Artes, debuxa, a tamaño natural, unha figura dunha escultura grega de dous metros de altura. Aproba co número 2, nun curso de 90 alumnos. Na escola aprenderá sobre forma e cor, técnicas e estilos. Nesta época visita o magnífico pintor ferrolano Álvarez de Sotomayor, que se converte no seu protector e mestre.Viaxa polo norte de Africa, Marrocos e Arxelia. En 1957 viaxa a París, onde vive entre museos e pintores. En 1959 volve a Madrid, e alí permanece ata 1997, ano en que regresa a Ferrol, onde monta o seu novo estudo no que segue traballando, cos bríos propios dun novo artista. A finais do ano 2006, o Concello de Ferrol organízalle unha Exposición Antolóxica onde presenta máis de 160 obras, que constitúe un éxito de crítica e público. Ao mesmo tempo élle concedida a insignia de ouro da cidade, e urbanízase unha praza fronte ao seu estudo que levará o seu nome.
Nenhum comentário:
Postar um comentário